漢字辨正

台語注音符號練習

 置玆提供幾項子無共體裁个資料，給伊分類予大家練習。因為目前網頁上採用橫式大字个注音，所佔空間真大，所以實際注起去个部份無濟。多數攏欲留予大家來發揮了！

 目前應用練習內容分為：小學課文﹑佛教經偈﹑阿母个話﹑台灣謎猜﹑台灣歌詩﹑漢字辨正佮推理分析等七大項。　

                               漢字辨正

            咱社會个媒體，無論報章雜誌抑是電視，時常有濫著台語語詞个標題出現，這是潮流行向本土化，上自然个現象。

 以前，置台語是一種禁忌个年代，伊个活力表現置老一輩个台灣人，佮市井小民个身上。所以，咱看會著小食店个「米苔目」﹑「切仔麵」，或者路邊販子个「倒店貨，淑淑賣」等一寡台語漢字。其他个所在，想欲看著台語文字个形影著難了。早期者一（ㄐㄧㄞ）土生土長个台灣人，字識無濟，置需要表達家己深層个感情﹑單純个意念時，只有量約借字來用。這雖然無好，不過，會予人感心。但是，報章定定出現个「莫宰羊」﹑「賭爛票」﹑「強強滾」等台語詞彙，玆用字个人攏受過教育，卻是無一定有漢學素養。以前是為著欲予一九四九年位中國撤退來台个人，直接看字讀音用个，煞藉著北京話音來注台語。這種代誌，至今亦擱予人感覺不倫不類，傷害台語个美感至深！

        今年（2001），台語正式納入九年國教課程，台語用字必須正視，未使擱凊採！以免影響眾人个學習意願。本人置這提出幾條來討論，本人所用台語漢字，力求正確。但疏漏之處在所難免，敬請諸位賢達，不吝賜教。

1.沖沖滾

           「強強滾」﹑「搶搶滾」，這是時下，上蓋流行个台語詞彙。伊顯然是藉北京話音个寫法，不是正確个用法。「沖」有兩種音：ㄑㄧㄤˇ ﹑ㄑㄧ（衝）。咱農村个水圳，遇著地勢加（ㄎㄚˋ）崎个所在，攏會做一個駁崁，予圳內个水流，位圳溝頂懸瀉落來，若瀑布共款，做田人給這款水利設施叫做「水沖」。這時，沖字讀ㄑㄧㄤˇ 。水，位頂懸沖落來下底，水花四濺，親像一大鼎水咧勃勃滾共款。看過這種景緻个人，攏會由衷讚嘆先人信手捻來「沖沖滾」這個詞个神韻！用伊來形容生理﹑或是對某種爭先恐後个鬧熱氣氛，上蓋密（万ㄚ）（貼切）个話語。住置都市个人，會使去二二八公園內二二八紀念碑个所在，體會十二個小水沖子「沖沖滾」个感覺。

            另有一說，煮飯快收湆時，表層會起一個個的泡，這做「嗆」，而這時候正滾著呢，所以把這種「嗆嗆滾」現像，引伸做人群場面熱滾滾的形容。這家家戶戶都會遇上的事，也算是很合理的用法。

2.阿媽

           「阿嬤」這個詞，是最近才被創造出來个。安呢寫个人，大概是驚佮母親个現代稱呼「媽媽」相濫。古早，台灣人一般叫母親「阿母」，真好分別，並無絲毫困擾。就是今子日，也無需要創造新詞。因為大家祖先个公媽牌所寫个，著是這字「媽」字，敢愛為現代「倉頡」，去大事修改台灣人公媽牌个寫法是不（ㄇ）？            

3.阿婆

            不知當（ㄉㄤ）時（何時）開始，真濟台灣人對女性老大人个稱呼，放棄家己叫「阿婆」良好个習慣，學中國大陸人叫「阿媽」。而且無愛教囝子稱呼同窗个父母「阿伯﹑阿姆」，或者「阿叔﹑阿嬸」，逮人咧流行「張媽媽﹑李爸爸」了。台灣人，汝對自己未免太無自信。莫怪一路上真濟爸爸﹑媽媽，連阿媽也是一大堆，真是成何體統！

4.米篩目

           「米苔目」是即馬（現在）小食店，上時行（ㄍㄧˇ）个寫法。正確个「米篩目」，頭一擺置台中一間規模真大个飲食店看著。米篩是用竹篾子編成个器物，用來篩米个。米篩一孔一孔个叫做「目」。給米漿位米篩捽落去，著會捽出一條一條成寸長个米漿，咱著給伊叫做「米篩目」。

5.俗俗賣

           俗（ㄒㄧ）者，便宜也，所以俗俗賣這句話，千萬不通擱寫做淑淑賣喔。俗也讀做ㄙˇ ，土包子个意思。俗語講「莊腳俗，街子戅。」著是這個意思。莊腳人袂（不會）給土豆叫是生置樹子頂，都市人也袂一入大餐廳，著感覺兩雙手不知也欲囥住（ㄉㄨㄚˋ）佗位。

6.不知也

           不知也，北京話叫做「不知道」。「不知也」這三字是田園之秋作者陳冠學前輩主張安呢寫个。有人寫「不知影」，因為「無影無跡」若像用「影」字加對，所以寫不知影。不過「無也無者」也是真有理哦，這著是咱台語文，目前上愛努力克服个困難所在。無論按怎講，千萬不通擱寫「莫宰羊」了。

7.子麵   （挊子麵）

    ，是一個重複頂﹑下震動个動作。麵下（ㄏㄧㄝ）落堝子（ㄜ   ㄚˋ）了後，欲熟个時，一起一落一直，安呢做出來个料理，叫做「子ㄚ麵」。現時，店頭攏寫做「切仔麵」，不通大家看慣習了，著無想欲改。

8.也會通

        大眾媒體，大都數攏寫做「嘛也通」。目前上流行个一句話是「用台語『嘛也通』哦！」 ，這又擱是一個用北京話譯音个實例。像這款个詞，對台語美感个傷害上深！希望有志之士，不通隨波逐流了。
9.聽無
         時下个報紙真愛湊兩句丫台語，但是用字全然無用心，這是美中不足个代誌。譬如「大家攏聽嘸！」伊給人「聽無」个無，無代無誌加一個口字旁，敢不是畫蛇添足咧。
10.迌
       「迌」 這兩字，是置早期个歌子簿出現个，這是會意字。不過目前台語流行歌个歌詞，煞給寫做「七桃」，是因為寫詞个人驚造字麻煩，抑是欲予人看字偎音？不管是什麼原因，個人認為無妥當。
11.有酒矸通賣無？壞銅舊錫﹑簿子紙通賣無？
        這是早期（四﹑五十年代）台灣街頭巷尾，擁聽會著个一個叫買聲。會使講是一項一面討趁一面做環保个工作，即馬才知也這款頭路个神聖。但是置媒體出現過：有酒矸「淌」賣無个字眼，這共款是一種以北京音偎台灣話音个現象。
        通，字音讀ㄊ，如交通，通行等。話音唸ㄊㄤ，如通風，不通講白賊等。其實通字个字音佮話音置共一個詞內面，表達無共个意思。比如：通行ㄊㄤ   ㄍㄧˇ 佮ㄊ   ㄏㄧㄥˇ 是無共意義。通風，這個詞也有這款情形。
        總講一句，一字多音是表義字～漢字个特色。無論汝認為伊是一種缺點抑是優點，攏愛對伊有正確个認識。
12.花跳﹑烏糖
        一個是海邊个生物，另外一項是市場个貨物。但是這兩項本土名稱攏漸被取代。花跳，是以外表花彩佮生性个動作號名，敢未比「彈塗魚」加生動？鳥糖个「烏」佮赤砂个「赤」，共款是一種形容佮比較而已，敢一定愛叫做「紅糖」？
        咱若欲論本土化，著愛先位尊重在地个一草一木做起，若無，只是淪為口號爾爾。請看夏威夷个鳥類﹑植物等，本土名稱攏受著尊重給伊保留，汝敢未感動？汝閣請看中國个山名﹑地名，有若濟已經恢復當地原名，譬如：呼和浩特（歸綏）﹑珠穆朗瑪峰（聖母峰）﹑塔克拉瑪干沙漠（大戈壁）﹑烏魯木齊（迪化）﹑…等，兩相對照之下，當汝行在台灣都市个「陝西」路﹑「西藏」路﹑「庫倫」街﹑「廣州」街﹑「康定」路﹑「成都」路﹑…个時陣，會作何感想？
…… 待續。