台灣歌詩

台語注音符號練習

 佇玆提供幾項子無共體裁个資料，給伊分類予大家練習。因為目前網頁上採用橫式大字个注音，所佔空間真大，所以實際注起去个部份無濟。多數攏欲留予大家來發揮了！

 目前應用練習內容分為：小學課文﹑佛教經偈﹑阿母个話﹑台灣謎猜﹑台灣歌詩﹑漢字辨正佮推理分析等七大項。

 台灣歌詩

        台灣早期个歌詩，真有內涵。其實誠濟詩詞，攏予人擊掌喝囋，會當千古流傳。譬如李臨秋个「望春風」，描寫十七﹑八歲个少女，思慕異性非常閉思（含蓄）个情懷，佇當今个作品內，已經是罕見了。七字子詩也共款，置玆，我摘幾首子予大家欣賞。

1.望春風 李臨秋 （鄧雨賢曲）

獨夜無伴守燈下（ㄝ），清風對面吹。

十七﹑八歲未出嫁，遇著少年家；

果然標緻面肉白，誰家人子弟，

想欲問伊驚歹勢，心內彈琵琶。

想欲郎君做翁婿，意愛在心內；

等待何時君來採，青春花當開。

聽見外面有人來，開門給看覓；

月娘笑阮戇大呆，予風騙不知。

2.情意九分九 （作者未詳）

阮兜灶下通恁兜，看汝每日偷探頭；

兩人 情意九分九，路下抵著頭勾勾。

灶下（ㄎㄚ）（廚房），通（ㄊㄤ），路下（ㄝ ）（路上），抵

（ㄉㄨˋ）著（遇上）。

3.玉蘭花 （作者未詳）

玉蘭開花芳透天，挽入房間芳歸暝；

將花拿入虻罩內，半暝芳到枕頭邊。

到（ㄍㄚˋ）。

註：（1）置文外所注个音是本調。唸歌詩的時，才自己照規則變調。

      （2）頂面兩首台語詩七字子，頭一擺是位李鴻禧教授个「台語之

                 美」錄音帶內聽著个。

 其實台灣文化豐富个內涵，抑擱真濟存佇七﹑八十歲漢學碩彥个腹內。不過，漸漸咧凋零。關心台灣文化个人，莫不盼望熱心公益个企業界，佮執政當局會注意位者（ㄐㄧㄚ）來。官民共同把握這稍縱即逝个機會，勇敢擔負起搶救台灣文化寶藏个千秋大業。

4.雨夜花 周添旺 （鄧雨賢曲）

        雨夜花、雨夜花、受風雨吹落地，

       無人看見，暝日怨嗟，花謝落土不再回。

       花落土、花落土、有啥人通看顧，

       無情風雨，誤阮前途，花蕊若落欲如何。

        雨無情、雨無情、無想阮个前程，

       並無看護，軟弱心性，予阮前途失光明。

        雨水滴、雨水滴、引阮入受難池，

       怎樣予阮，離葉離枝，永遠無人通看見。

5.四季紅 李臨秋 （鄧雨賢曲）

    春天花，當清香，兩人心頭齊震動 （男）有話想欲對汝講，不知通抑不通。

（女）叨一項？（男）敢也有別項！（女）肉呅笑，目睭降。

（合）汝我戀花朱朱紅。

   夏天風，正輕鬆，雙人坐船在遊江 （男）有話想欲對汝講，

      不知通抑不通。

      （女）叨一項？（男）敢也有別項！（女）肉呅笑，目睭降。

      （合）水底日頭朱朱紅。

   秋天月，照紗窗，雙人相好有所望 （男）有話想欲對汝講，

       不知通抑不通。

      （女）叨一項？（男）敢也有別項！（女）肉呅笑，目睭降。

      （合）嘴唇胭脂朱朱紅。

   冬天風，真難當，兩人相好不驚凍 （男）有話想欲對汝講，

      不知通抑不通。

     （女）叨一項？（男）敢也有別項！（女）肉呅笑，目睭降。

     （合）愛情熱度朱朱紅。

6.搖嬰子歌 呂泉生曲 盧雲生填詞

（原呂泉生詞，後來盧雲生補填，在此只選其中三段）

嬰仔嬰嬰睏，一暝大一寸，嬰仔嬰嬰惜，一暝大一尺。

搖子日落山，抱子金金看，汝是我心肝，驚汝受風寒。

嬰仔嬰嬰睏，一暝大一寸，嬰仔嬰嬰惜，一暝大一尺。

同是一樣子，那有兩心情，查甫也著疼，查某也著晟。

嬰仔嬰嬰睏，一暝大一寸，嬰仔嬰嬰惜，一暝大一尺。

疼子像黃金，晟子消責任，飼到恁嫁娶，我才會放心。

7.搖籃曲

      回想當（ㄉ ㄥ）置咧育兒个彼當（ㄉ）時，抑（ㄧㄚ）（還）無緣抵（ㄉㄨ）著本土个搖嬰子歌。因為彼久台語个研究，抑無時行。安呢欲安怎？好佳在，彼陣腦海內有來了一個靈感：給莫札特搖籃曲填詞，敢不是真好咧！著安呢，我給莫札特﹑舒伯特佮布拉姆斯三位大師个作品（佇共一塊錄音帶內），攏給填了台語歌詞，佇（ㄉ帀）放音樂个時陣，承續唱予嬰子聽。有一擺，我發見嬰子聽著莫札特搖籃曲个時陣，微微笑，我才深深了解，音樂震撼人心个力量，位嬰子著看會出來。

        後來，我給莫札特搖籃曲填个詞，收入拙作台語呼音法內面，希望佮大家分享。

       閣無若久，我置一間嬰兒用品店，看著一塊錄音帶，內面有一條搖嬰子歌，我才（ㄐㄧㄚˋ）恍然大悟，原來咱台灣有家己个搖籃曲。有者呢（這樣）好个作品，我竟然不知，旋律非常媠（美），無輸西洋大師个作品，真使人衷心讚嘆。雖然我旋一大輪，拚歸晡才抵著本土个搖嬰子歌，但是我所做个代誌，感覺也真有價值性。所以，佇者（在這裏）披露予大家知也，有興趣个人，會用个去買一塊絲知（ㄒㄧ ㄉㄧ）CD返來和（ㄏ）看覓，大家著用這个方法，共同給天籟傳予咱身軀邊个小天使！

莫札特搖籃曲     王俊明 填詞

搖啊搖，搖啊搖（前奏）

嬰子搖搖喔喔睏，看汝一暝大一寸；

惜啊惜，嬰子搖搖，看汝大一暝一尺。

搖阿嬰，日～落山，抱幼子，金～金看；

汝～是娘～心肝，阮～驚汝受風寒。

嬰子搖搖喔喔睏，看汝一暝大一寸；

惜啊惜，嬰子搖搖，看汝大一暝一尺。

搖豬腳，搖阮金子，甜吻吻，阮 个 心情；

緊大漢通鬥挽茄，嬰子搖搖嬰嬰惜。

注音：嬰子   ㄚ 喔喔睏   ㄎㄨㄣ 金子ㄍㄧ ㄇ   ㄍㄧˋ 甜吻吻ㄉ  万ˋ 万（甜蜜蜜）

註：字邊有～的符號者，表示彼字對應兩個音符以上，以下同。

舒伯特搖籃曲 王俊明 填詞

嬰子搖喔喔睏，看汝一暝大一寸～；

惜啊惜嬰子搖，看汝一暝大一尺。

搖豬腳搖金子，甜吻吻阮心情；

緊大漢鬥挽茄，嬰子搖搖嬰嬰惜。

嬰子搖喔喔睏，看汝一暝大一寸～；

惜啊惜嬰子搖，看汝一暝大一尺。

搖阿嬰日落山，抱幼子金金看；

汝是娘心～肝，阮～驚汝受風寒。

嬰子搖喔喔睏，看汝一暝大一寸～；

惜啊惜嬰子搖，看汝一暝大一尺。

搖豬腳搖金子，甜吻吻阮心情；

緊大漢鬥挽茄，嬰子搖搖嬰嬰惜。

布拉姆斯搖籃曲         王俊明 填詞

嬰子搖喔喔睏，看汝一暝大一寸；

惜啊惜～嬰子搖，看汝一暝大一尺。

搖豬腳搖金子，甜吻吻～阮心情；

緊大漢鬥挽茄，嬰子搖～嬰嬰惜。

嬰子搖喔喔睏，看汝一暝大一寸；

惜啊惜～嬰子搖，看汝一暝大一尺。

搖阿嬰日落山，抱幼子～金金看；

汝是娘心～肝，阮～驚汝～受風寒。

嬰子搖喔喔睏，看汝一暝大一寸；

惜啊惜～嬰子搖，看汝一暝大一尺。

搖豬腳搖金子，甜吻吻～阮心情；

緊大漢鬥挽茄，嬰子搖～嬰嬰惜。