第一節 緣起
我是師範生，置小學任教，逐工佮ㄅㄆㄇ鬥陣，長達十四年。十幾年來，我只顧教導學生讀書識字佮做人的道理，卻從來不捌想過欲教家己不識字的母親，認識幾個丫字。後來我保送師大深造，畢業後分發國中教二年，才商調到高中任教。因為通勤路途遙遠，來去不便，有時返到厝內看無著母親，擱不知也伊去佗位，不免掛慮在心。
有一工，我想著欲是母親識字，有法度提筆寫一個字條，不是誠好？著安呢我緊去台灣書店，給小學一年的國語課本買返來，當欲進行教學的時，突然有一道靈感閃過我的腦海：我哪不教母親注音符號，直接呼出台語，以免一位年近七十的老大人，才位頭去學彼款筆劃繁雜的漢字。
位彼陣開始，我著手研擬一套台語的注音符號。後來我捌聽過朱高正委員，用流俐的台語演講，頭一擺發見台語竟然遐呢動聽！我也捌到當時的士林廢河道佮清水紫雲巖，聽過謝長廷議員的演講，才知也人瑞士有四種官方語言，其中羅馬語使用人口，只占全國的千分之三爾爾。阿咱台語在台灣的通行人口，高達七成五以上，竟然無一點子地位！因此，為發揚母語的使命感，恬恬丫住心內產生。
著置每工上﹑下班三﹑四點鐘長長的路程上，有時丫在莒光號列車頂，有時丫在高速公路奔跑的中興號車內，陸陸續續捕捉著的靈感，終於在一九八六年五月，擬好了注音符號初稿。經過兩年的試驗佮斟酌，在一九八八年五月，一套台語注音符號終於完成。彼陣在國內雙語教育的呼聲己經響徹雲霄，我給擱經過兩載考驗的台語注音符號，當面送請維護台語文化不遺餘力的李鴻禧教授賜教，伊答應帶返研究後才講。幾工後，伊督促我先住各大報系發表。彼年也就是一九九0年六月，由民進黨主政的七縣市委託宜蘭縣政府，住南港中央研究院，承辦一場「台灣本土語言教育問題學術研討會」。我有幸獲當時的縣長游錫堃先生通知參加，看著遐濟賢達齊聚一堂，予人非常感動，台語呼音法就置彼年十月出版了。
第二節 演變
當當時，我有滿腹的熱忱，欲給這套符號推出予全國人民知也。我去見開班授徒教台語的蕃藷教室負責人，彼時的議員賁馨儀女士，希望有機會通試用看覓咧。但是伊講雖然教會彼套無啥好用，毋苟人伊有真濟工具書通用，阿汝的敢有？
著是安呢，予我決心欲編「台語常用字彙集」這本書。置我咧進行整理古籍「彙音妙悟」的時，偶然間又擱有一道靈感的光閃過腦海，我發現了「妙通輸入法」。無想著為了開發輸入法，舞到舊年年底才有時間，擱繼續彼本簡明字典的編纂工作。
舊年（2000年）六月學期末，我得著兩間小學校長佮全體老師的熱心幫助，順利完成了母語教育第一線工作者小學老師，對注音符號看法的問卷調查。結果攏是超過五成的老師，支持台語呼音法這套符號。教育部編印的佮台灣語文學會設計的彼兩套，贊成的老師干若寥寥少數而已！
但是一個月後，我參加教育部委託中央研究院學者召集的討論會。我有本著來參加討論會的初衷：若是無盡力走縱，予全國人民知也台語呼音法這套注音符號，等那政府定案了後，將來有一工才發見這套比較加好，我會對不起全國人民，終生感覺內心不安。所以，會中我儘量發言，雖然無一項無予人否定，我抑是不死心。終算提出一個論點予大家重視了，用教育部編印的彼套，恐驚會有傷害兒童眼力之慮。但是未值ㄝ一個不知也對抑不對的異議，著擱予人否定了。我看著今子日的聚會，若參像是欲叫阮來，為教育部編印的彼套符號背書而已，全然無一點子科學﹑民主的精神置內面。這陣，我感覺問卷調查的代誌，若無講出來，一世人攏會感覺虧欠，協助填寫問卷的全體老師。所以，我把握討論會拄即結束的時，向與會的眾人講出心聲：為按怎，我去國小向老師做問卷調查的結果，超過半數支持的一套符號，置這煞攏全盤被否定？
列席的恩師姚教授講：「這汝哪不加早提出來咧！」隨後，討論會主持人董教授，佮列席長官：新上任的國語會主委曹教授，兩位攏當面給我講：「汝給問卷調查的結果，寄一份予我。」為著欲加做一份問卷，我等到九月開學以後才寄予伊。
演變到即馬，代誌煞變成符號之爭。我全然無含個人利益佮習慣的兩大包袱，只干那希望主事者，提出良知佮魄力，以公開﹑科學佮民主的態度來處理。務必做出明智的決定，以免損害台灣子弟日後學習母語，全體孩童視力佮效力的諸多利益！我想藉這個園地，披露問題予全國關心母語教育的人士，共同來正視政府制定公共政策的程序正義。也祈禱上蒼庇佑，予咱的子弟，會當得到上好的結果！
目前，置咱台灣的社會內面，有真濟人主張台語注音，採用羅馬拼音。我歸納
所講的理由，大約是講注音符號未準﹑不利電腦輸入﹑無法度國際化佮對岸中國十二億人口，也是用羅馬拼音等幾個觀點。不過，我欲提出我的看法，予大家換一個角度來看代誌。若欲論呼音準確，華語現時的符號，確實有結合韻音變的問題存在，譬如：翁ㄨㄥ﹑先ㄒㄧㄢ﹑…等。但是伊的效果也是遐呢大，這是有目共睹的。當然，咱未使無志氣，擱重踏華語的覆轍。所以置制定台語注音符號的時陣，著儘量避免這項缺失了。而且依照臺灣師大語言中心，多年教學的經驗，連外國人置發見注音符號的好處了後，都會自動要求欲學注音符號咧。
續落，若論起電腦輸入的問題，本人開發的妙通輸入法，足以解決這個困難。啊那國際化這個論調，真正予人啼笑皆非！一個家己的子弟，自小漢著給教華語，已經變成全國風氣的國度，竟然抑咧數想欲國際化，敢講想欲叫外國人替咱傳教台灣話？按照目前的處境，若是用ㄅㄆㄇ來搶救台語生態，會使講是順水推舟，上蓋省力！
講起注音符號只干那台灣咧用爾爾這層代誌，更加無用大腦。十二億人口所行的路，敢一定值得咱亦步亦趨？這點我有幾個理由可以證明絕對未使！
第一﹑
大膽以全部人民為對象，實驗社會主義經濟制度，敢有成功？
第二﹑大膽以全部人民為對象，實驗社會主義經濟制度，敢有成功？推行簡體字，結果頭人置的國家公園題字，哪會愛寫繁體字咧？而且機場也開始出現繁體字了。第三﹑二十一世紀，是一個人民追求民主﹑自由佮廉能政府的時代；更加是一個和解無對抗，人人有世界地球村理念的時代。對岸敢有予咱任何消息？若無，為安怎，為著台語教育選一套注音符號，都欲逮人後壁行？
尤其是主張台語全面羅馬化的人，根本忽略一個形勢比人強的現實：汝敢有法度給「台北車站」四字，換做羅馬字？抑是全部街路看板的漢字，攏給換做羅馬字。啊無咱所學的台語，欲安怎應用住生活內面？台語教育著是漢字教育，敢是真顯然的代誌！
漢語是孤立語，漢字又擱是表義的符號，注音符號只干那是學習台語的工具而已，等那會曉以後著免用了，大家學華語的經驗敢不是安呢？所以，台語教育若用注音符號，利多於弊，這是真明顯的代誌！
